கலைஞர் நினைவு தினம் தூத்துக்குடியில் பேரணி கீதாஜீவன் அறிக்கை

முன்னாள் முதலமைச்சர் திமுக தலைவர் கலைஞர் 8-ஆம் ஆண்டு நினைவு தினம்: தூத்துக்குடியில் பிரம்மாண்ட அமைதிப் பேரணி – புகழஞ்சலி நிகழ்வுகள் நடைபெறவுள்ளது. மாவட்ட செயலாளர் கீதாஜீவன் அறிக்கை.

தூத்துக்குடி:
நவீன தமிழகத்தின் சிற்பியும், முத்தமிழறிஞருமான கலைஞர் மு.கருணாநிதியின் 8-ஆம் ஆண்டு நினைவு தினத்தை முன்னிட்டு, தூத்துக்குடி வடக்கு மாவட்ட திமுக சார்பில் ஆகஸ்ட் 7 (வெள்ளிக்கிழமை) அன்று அமைதிப் பேரணி மற்றும் புகழஞ்சலி நிகழ்வுகள் நடைபெறவுள்ளதாக வடக்கு மாவட்ட திமுக செயலாளரும், முன்னாள் அமைச்சருமான பி.கீதாஜீவன் தெரிவித்துள்ளார்.
​இதுகுறித்து அவர் வெளியிட்டுள்ள அறிக்கையில் கூறியிருப்பதாவது:

​காலை 7:30 மணிக்கு அமைதிப் பேரணி:
முத்தமிழறிஞர் கலைஞரின் 8-ஆம் ஆண்டு நினைவு தினத்தை முன்னிட்டு, ஆகஸ்ட் 7 வெள்ளிக்கிழமை காலை 07:30 மணி அளவில் தூத்துக்குடி V.V.D. மெயின் ரோடு – டூவிபுரம் 5-வது தெரு மற்றும் அண்ணா நகர் 7-வது தெரு சந்திப்பில் பி.கீதாஜீவன் தலைமையில் அமைதிப் பேரணி தொடங்குகிறது.
​இந்தப் பேரணி கலைஞர் அரங்கம் வரை சென்று, அங்கேயுள்ள கலைஞரின் திருவுருவச் சிலைக்கு மாலை அணிவித்து மரியாதை செலுத்துதலுடன் நிறைவடைகிறது.

​கோவில்பட்டி மற்றும் கிராமப் பகுதிகளில் நிகழ்வுகள்:
இதேபோல், தூத்துக்குடி வடக்கு மாவட்டத்திற்குட்பட்ட கோவில்பட்டியில் அமைதிப் பேரணி நடைபெற்று கலைஞரின் திருவுருவச் சிலைக்கு புகழஞ்சலி செலுத்தப்படவுள்ளது.
​மேலும், மாவட்டத்திற்குட்பட்ட அனைத்து ஒன்றியங்கள், பேரூர்கள், நகரங்கள், பகுதிகள், வட்டங்கள் மற்றும் கிளைக் கழகங்கள் தோறும் கலைஞரின் திருவுருவப் படம் அலங்கரித்து வைக்கப்பட்டு, மாலையிட்டு புகழஞ்சலி செலுத்த ஏற்பாடுகள் செய்யப்பட்டுள்ளன.
​தமிழகத்தின் விடிவெள்ளி:
திராவிட முன்னேற்றக் கழகத்தின் தலைவராக சுமார் 50 ஆண்டுகள், தமிழகத்தின் முதலமைச்சராக 19 ஆண்டுகள் வீற்றிருந்து, போட்டியிட்ட அனைத்துத் தேர்தல்களிலும் வெற்றி பெற்று 60 ஆண்டுகள் சட்டப்பேரவை உறுப்பினராகப் பணியாற்றிய பெருமைக்குரியவர் கலைஞர். பெண்களுக்கான சொத்துரிமை, கணினி கல்வி அறிமுகம், தகவல் தொழில்நுட்பத் துறையில் தமிழகத்தை முதன்மை மாநிலமாக்கியது, பிரம்மாண்ட மேம்பாலங்கள் மற்றும் நூலகங்கள் அமைத்தது என நவீன தமிழகத்தை உருவாக்கிய அவரது புகழை என்றும் நன்றியோடு நினைவுகூர்வோம்.

​நிர்வாகிகளுக்கு அழைப்பு:
தூத்துக்குடி மாவட்டத்தில் நடைபெறும் இந்த நினைவேந்தல் நிகழ்வுகளில் வடக்கு மாவட்டத்தைச் சேர்ந்த மாவட்ட, மாநகர, நகர, ஒன்றிய, பகுதி, பேரூர், வட்ட மற்றும் கிளைக் கழக நிர்வாகிகள், மாநில-மாவட்ட அணிகளின் நிர்வாகிகள், முன்னாள்-இன்னாள் பிரதிநிதிகள் மற்றும் கழக செயல்வீரர்கள் பெருந்திரளாகக் கலந்துகொள்ளுமாறு கேட்டுக்கொள்ளப்படுகிறார்கள்.
​இவ்வாறு கீதாஜீவன் வெளியிட்ட அறிக்கையில் தெரிவிக்கப்பட்டுள்ளது.