வருவாய்த்துறை அலுவலர்கள் சங்கம் கல்வி உதவி, கலெக்டர் வழங்கினார்

தூத்துக்குடியில் வருவாய்த்துறை அலுவலர்கள் சங்கம் சார்பில் ஏழை மாணவருக்கு ரூ.60,000 கல்வி உதவித்தொகையை மாவட்ட ஆட்சியர் விஷு மகாஜன் வழங்கினார்.

தூத்துக்குடி புனித பிரான்சிஸ் மேல்நிலைப் பள்ளியில் பயின்று பொறியியல் படிப்பிற்குத் தேர்வாகியுள்ள தந்தை இல்லாத ஏழை மாணவனுக்கு, வருவாய்த்துறை அலுவலர்கள் சங்கம் சார்பில் ரூ.60,000 கல்வி உதவித்தொகையை மாவட்ட ஆட்சியர் விஷு மகாஜன் வெள்ளிக்கிழமை வழங்கினார்.
​தூத்துக்குடி மாவட்டத்தைச் சேர்ந்தவர் மாணவர் சிம்சன். இவர் தூத்துக்குடி புனித பிரான்சிஸ் மேல்நிலைப் பள்ளியில் மேல்நிலைப்படிப்பை நிறைவு செய்தார். தந்தையை இழந்து வறுமைச் சூழலில் வாழ்ந்து வந்த இவர், சமீபத்தில் நடைபெற்ற அரசுப் பொறியியல் கலந்தாய்வில் பங்கேற்று, வேலூரில் உள்ள ‘தந்தை பெரியார் அரசு தொழில்நுட்பக் கல்லூரியில்’ கணினி அறிவியல் பாடப்பிரிவில் (Computer Science) பயில இடம் பிடித்தார்.
​குடும்ப வறுமை காரணமாக உயர்கல்விக் கட்டணத்தைச் செலுத்த சிரமப்பட்டு வந்த மாணவர் சிம்சனுக்கு உதவும் வகையில், தமிழ்நாடு வருவாய் துறை அலுவலர்கள் சங்கத்தின் தூத்துக்குடி மாவட்டக் கிளையின் சார்பில் அவருடைய முதலாண்டு கல்வி கட்டணத்திற்காக ரூ.60,000 நிதி திரட்டப்பட்டது.
​இதனைத் தொடர்ந்து, தூத்துக்குடி மாவட்ட ஆட்சியர் அலுவலகத்தில் நடைபெற்ற நிகழ்ச்சியில், மாவட்ட ஆட்சியர் விஷு மகாஜன், மாணவர் சிம்சனை நேரில் அழைத்து வாழ்த்தி, சங்கத்தின் சார்பில் வழங்கப்பட்ட ரூ.60,000 கல்வி உதவித்தொகைக்கான காசோலையை வழங்கினார். மேலும், மாணவர் நன்றாகப் படித்து எதிர்காலத்தில் மிகச் சிறந்த நிலையை அடைய வேண்டும் என்று ஊக்கமளித்தார்.
​இந்நிகழ்வின் போது தூத்துக்குடி மாவட்ட வருவாய் அலுவலர் மூ. குருச்சந்திரன், வட்டாட்சியர்கள் ஞானராஜ், ஜஸ்டின், துணை வட்டாட்சியர் ஜெய் கிருஷ்ணன், வருவாய் ஆய்வாளர் சுகுணா மற்றும் வருவாய்த்துறை அலுவலர்கள் சங்கத்தின் பிரதிநிதிகள் உடன் இருந்தனர். அரசு அலுவலர்களின் இந்தச் சமூக அக்கறையுடனான உதவி அப்பகுதியில் பெரும் பாராட்டைப் பெற்றுள்ளது.